Staaltjies oor die Grewars
Sodra ons genoeg staaltjies het, sal ons hulle op aparte bladsye sit.
'n Prokureur se raad kos geld
Peter skryf:
My ma se ouer broer - Peter George Louwrens Grewar - was 'n prokureur van
beroep, en het ook in sy vrye tyd geboer. Hy het sy praktyk op die klein
Noord-Vrystaatse dorpie Petrus Steyn gehad. Blykbaar was hy ewe suksesvol
in sy boeredry as in sy prokureurskantoor, want die volgende staaltjie oor
my oom George (soos wat hy onder die familie bekend was) is onlangs deur
landdros André Groenewald van Welkom aan my vertel.
Oom George het een jaar 'n buitengewoon groot koringoes gehad. Boonop was
die koring van 'n besonder goeie gehalte. Die storie oor sy sukses op die
plaas het gou onder mede boere versprei. Eendag kom daar toe 'n boer by hom
wat hom oor sy suksesverhaal uitgevra het. Die boer het onder meer gevra
wat sy geheim is, en wat hy alles gedoen het om so 'n buitengewoon groot
sukses met sy koring te behaal. Oom George het positief gereageer op die
boer se vrae en hom alles vertel wat hy wou weet.
Na sowat 'n maand ontvang die boer toe, tot sy groot verbasing, 'n groot
rekening van mnr Grewar. Die boer het oom George gebel en verontwaardig
gevra wat vir 'n groot rekening dit is wat hy ontvang het. Hy is nie bewus
daarvan dat hy enige regshulp van mnr Grewar gevra en ontvang het nie.
Soos die storie dit wil hê, het oom George glo vir die boer gesê dat hy 'n
professionele mens is, en dat die rekening wat hy hom gestuur het, vir die
professionele inligting oor sy suksesvolle koringoes was.
|
